Fulɓe e kuutira balndi nder metuki. Mawɓe Fulɓe daga ko neeɓi to e mbolwa, e ɓe meta nder balndi. Balndi e holla haala suuɗika. Sey to neɗɗo numi ko luggi nden hetta ko ka wiˈata ngam faama. E woodi balndi Fulfulde feere-feere.
Raa to janngata balndi dow Ngikku Boɗɗum:
(1) E mi yiɗi nyaamuki ammaa mi yiɗaa nyaameeki.
(2) Kodde nani lamɗam.
(3) Mbabba hootani tallorde mum.
(4) Moye foti wi’a hoore inna/daada laamiɗo e woodi tenɗi?
(5) Muusuru/Ɓullundu e anndi to wasata buˈa.
(6) Nyaaki piɗi metoowo e ɗemngal.
(7) Ŋatiiyam e moɗiiyam nanndaa.
(8) Feˈirde semtataa koyngal joomum.
(9) Puutuɗo monnataa nanuɗo nde.
(10) To a yaha, taaˈ yejjutuu a ladiino.
(11) Colli nannduɗi pirdata.
(12) Daɗɗo colli naa’ ɗum duujiije.
(13) Gootal kuɓɓoowal.
(14) To a fiyi neɗɗo taa’ haɗumo woyuki.
(15) To bumɗo wi’i no daway, to sey to ɗowwowo-mo jaɓi.
(16) Natti hoccaayi hisnataa gujjo.
(17) Cobbal ɗotti kosam.
